منتدى نادي الابداع الفكري - عين الدفلى
-*-*-منتديات نادي الابداع الفكري-*-*-
المنتدى قيد التطوير نرجو من زوارنا الكرام
ان يساهموا معنا في تطوير المنتدى
رايكم يهمنا فلا تبخلوا علينا بالتسجيل والمساهمة
بالمواضيع


منتدى طلابي تثقيفي - معا نصنع التميز - Club de la créativité intellectuelle
 
الرئيسيةاليوميةمكتبة الصورس .و .جالتسجيلدخول

شاطر | 
 

 جبتلكم نكت جزائرية 2010

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
اسماء sam
وسام التميز
وسام التميز


عدد المساهمات : 995
نقاط : 2388
السٌّمعَة : 1
تاريخ التسجيل : 12/11/2010
العمر : 23

مُساهمةموضوع: جبتلكم نكت جزائرية 2010    السبت ديسمبر 18, 2010 5:39 pm

جبتلكم نكت جزائرية 2010

* واحد كي يشرب قهوة إلوح فيها 20 مغرف سكر ديما ، خطرة domonda قهوة لاح فيها 15 مغرف سكر برك، شافوا serveur قالو: كيفاه هداك ربي درت 15 مغرف برك ،قالو: تسالي نشربها مرة.
* واحد معندوش الزهر وين إروح يصرى مشكل فهذيك لبلاصة ،كره راح سافر لصحرا فطائرة قالتلهم المضيفة لازم واحد يهبط ،جات فيه القرعة نزلوه ، شفو(تأسف) واحد اعطاه كاسكروت (اللمجة) كي طاح فصحرا بقى يمشي حتى لقى عفريت ،قالو: العفريت واش تطلب نعطيك ، قالو: ردني لبلادي ، قالو: سهلة غمض عنيك تلقى روحك في داركم ، مسكين غمض عنيه سرقلو العفريت الكاسكروت نتاعو.

*
واحده المرأة اشتركت فى من سيربح المليون طلقها زوجها لأنها اتصلت بصديق

*قالك وحد النهار وحد السيد شارك في حك تربح
أيا......ربح..
وربح يعني ربح...ادا دراهم كبار..
جات ليه الصحافة للدار..
قالولو ايه هيه ..والمبلغ...!!
قاللهم واش بيه قالولو واش راك ناوي تدير بيه?
قاللهم....نحسبوا.....هههههههه.

*قاللك واحد قال لصاحبو // عندك خمس الاف باه نشرب قهوة?
قالو علاش 5 الاف كامل ياخي القهوه تدير ألفين!!
قالو علابالي بصح جاتني حشومة انا نشرب وانت ما تشربش..
ايا قلت انخلصلك..خسارة فيك قهوة? hhhhhhh yh iiiiiiiiiiii

*قاللك وحد الشيخ ساكن على برا من وقت كان صغير ما دخلش للبلاد...

ايا وحد النهار دخل...شاف شرطي فاتح ذرعتيه (خدام) ..ايا راح عنقو.....ههههههههههههههه

*قاللك واحد دخل للقرقوطي (fast food)...
قاللو اعطيني 02 كاس كروطات واحد ديرلو الهريسة وواحد ماتديرلوش..
وجدهم لو مبعد قالو..هاهم 02 كاس كروطات ...وينهو لي تديرلو الهريسة (الحرور) و وينهو اللي ما تديرلوش!!!!!!
هههههههههههههه

*قيل لاعرابي ...ما اسم المرق عندكم؟
قال ...السخين.
قيل ...فإذا برد؟
قال...لا نتركه يبرد.

*قالك واحد يخمم غير في الماكلة قاللهم كي نموت وتجيو باش تدفنوني حطوني على شقي الايسر...
قالولو علاش؟...
قاللهم باه ما تحكمنيش (الامساك) La constipation ..
قاللك وحد الطفل ينسى بزاف....
قالو الاستاذ علاش راك كاتب حرف (ر) في الصفحة الولى نتاع كراسك..
قالو باش ننفكر نحط الرسالة في محطة البريد.
قاللو الاستاذ و حطيتها ولا مازال؟
قاللو التلميذ....انسيت ما كتبتهاش.
هههههههه


*قاللك واحد ديما يخلط في زوجتو و يحب يفاتنها....
جابلها 04 حبات بيض قالت ياخا كيفاش ندير معاه نقليهم يقولي علاش ما غليتيهمش!! نغليهم يقولي علاش ما قليتيهمش....
ايا راحت قلات لو 02 و غلاتلو 02
جابتلو صحن نتاع البيض المقلي..قاللها اووووووف منك انتي علاش ما غليتيهش ياخي تعرفيني نحب المغلي...
قالتلو هاك المغلي ياسيدي...قاللها ...انت عمرك ما تتسقمي اللي كنت حابك تقليهم غليتيهم واللي باش تغليهم اقليتيهم!!!!!

*قاللك 02 راحو لسويسرا قال واحد لصاحبو ...علاش الديور هنا يبنوهم بالخشب؟
قاللو هاها هذي ماتعرفهاش ؟ الحجر يحتاجوه باش يبنو بيه الجبال...!!!!

*قاللك واحد توريست (سائح) دخل للمتحف ...ايا و سئل ل agent
يا خويا هذي الجمجومة وشحال في عمرها؟
قاللو لاجون agent ...عمرها 500003 سنة
قالو وكيفاش حسبتوها بهذي الدقة كامل؟
قاللو ساهلة ...انا عندي 03 سنين وانا نخدم هنا
كي دخلت قالولي في عمرها 500000 سنة.

*قاللك واحد عندو شكارة صحيحه تلاقى مع واحد صاحبو زوالي مقطًع ...بصح عندو بنتو شابة شابة رعده...
قاللو واش تقول لوكان تزوجني بنتك ونعطيلك وزنها ذهب؟
قاللو لاخر اعطيني مهلة نتاع شهر!!!
قاللو علاش انت لازمك شهر باش تخمم في حاجة كيما هذي؟
قاللو لالا ماشي باش نخمم...باش نقرسها (نسمنها)............ههههههههههههههه.

*كيما حنا نقولو بوس عينك حبابنا السوريين يقولوا.............. بلٌط البحر....
وهذا طفل سوري عندو عمو مازن يخدم الكارلاج.
بابا و ماما نتاوعو يحكيو عليه.....حبيبي إياد ..........
تع حبيبي إياد لأسألك كم سؤال....قلي حبيبي إياد مين شق البحر؟
قال....اللي شق البحر هو سيدنا موسى عليه السلام ..
ممتاز حبيبي إياد طب قلي مين بلطو؟
قال....عمي مازن...مين يبلط من غيرو يعني؟

*قاللك وحد العام وحدة مصرية دخلت لمطعم عندنا....
دوموندات دجاجة ...طرطقتلها يمات يماها في 10 دقايق و راحت للسيرفور قالتلو....الفلوس كم؟
قالها واش هذيك الجاجة ما شبعاتكش حابة تزيدي فلوس؟

*قاللك واحد كان يلقف ( يحتضر) وزوجتو قاعدة عند راسو وبدا يتمتم ويهدر معاها....
مليكة.....بقاو 02 دقايق في حياتي اذا كثر....نعطيك سؤال وجاوبيني بصراحة...كنتي fidele معايا طول حياتنا و عمرك ما خنتيني؟
قالتلو نجاوبك بصح قبل هذا نقولك سؤال وتجاوبني بصراحة وما تكذبش علي؟ قاللها ما نكذبش....
قالتلو قول والله غير نموت صح.........!!!!
*قاللك في وقت كسرى كان الحوت عزيز و أنديسبونيبل قليل وين تشوف حوته...
وحد الصياد حكم حوته.............مزهار........
سمع بيه كسرى وأمر الحراس باش يجيبوه هو و الحوته...
قالو ...ايه يا الصياد واش حال رام عاطيين فيها؟......قالو ماعطاوش قالو وشحال راك طالب فيها قالو ماهيش للبيع....
ايا شحن كسرى وقال نغريه قال وش رايك نعطيك فيها كموسة دراهم...قالو هاك الحوته راهي ملكك....
ادا الكموسة و جا خارج.....الجارية حسدت زوجة الصياد في الدراهم بيناتهم عداوة...
قالتلو يا سيدنا كسرى خليتو كلخلك وادالك كموسةدراهم كيما هذيك على جال حوته ماعندكش حتى الفريجيدار باش ماتخسرلكش؟؟
كسرى خدمتلو...قاللها والله غير صح كلخلي بصح عيب ذرك نقوللو رجعهالي......
قالتلو خاطيك الشي انا ندبر راسي انت ماعليك غير تعيطلو يجي ليك.....
جابوه..قالتلو يا صياد هذي الحوته انثى ولا ذكر ...باش اذا قال ذكر تقول بصح السلطان يحوس على انثى واذا قال انثى تقول العكس..
فاق لها ...قاللها هذي الحوته خنثى يعني انثى وذكر تقدري تقولي.....اللي كانو حاضرين كامل ماتو بالضحك...حتى السلطان..وامر باش يعطوه كموسه دراهم اخرى على ذكاءو.....ادا الكموسات وجا رايح..وهو خارج طاحت لو قطعه نقدية.....احنى روحو ورفدها وما سمحش فيها........قالت الجارية قدام السلطان ياخي جيعان يا خي قطعه وما قدرتش تسمح فيها هذي قلة حياء..كيفاش يدير geste كيما هذا قدام السلطان..................السلطان عاودت خدمتلو ...قالو يا صياد...ارواح هنا .....واش قلة الحياء هذي عطيتك زوج كموسات وما ستحيتش تنحني باش ترفد قطعة قدامي...؟
قالو يا سيدي السلطان صفي النية راك غالط انا ماشي قصدي ما نسمحش فيها بصح علابالك بلي النقود راك ناقش فيهم تصويرتك وانا قلبي ما يخلينيش بعد هذا الخير اللي درتو فيا نخلي فيقورتك (صورتك) تطيح في الارض.....السلطان غاضتو عمرو وجاه البكا وقالو والله غير تسمح لي يا الصياد غلطت في حقك......زيدولو كموسة دراهم ووصلوهم لو حتى للدار.
*
مرة واحد جاهل اتزوج بوحدة ولدت بعد 3 شهور حلف يقتلها
قالتله رواح نحسبوها أنت شحال عندك من لي تزوجت ؟
قالها 3
قالتله وانا شحال عندي من لي تزوجت؟قالها 3
قالتله واحنا شحال عندنا من لي تزوجنا؟قالها 3
قالتله 3و3و3 يساوي 9
قالها صدق اللي قال العلم نور

*قاللك واحد فنيان فنيان فنيان حتى ما يقدرش يحل فمو ويهدر.......
راح للقهوه وراه قاعد ماعيط للقهواجي وهذاك ما جا ليه...والساعه راهي تدور ...ساعه زوج تلاته ربعه....
و واحد جارو يعرفو مليح قال اليوم مانروح نخدم غير نعسو وش راح يدير فيها.....
مبعد الفنيان هذاك تثاوب وبطا و هو حال فمو......جاليه جارو قالو .....دير plaisir في عمرك profitez l'occasion و demandez قهوة مادام حليت فمك...ياخي فنيان ياخي...

*قالك واحد شاف 02 ذراري ديما يمشو مع بعض.....قالهم الله يبارك خموس عليكم شحال شبان ...وتتشابهو بزاف انتما خاوة؟
قالولو ايه توام.......
قاللهم او الله يبارك.....قولولي انتما خاوة....من الام ولاب؟

*قالك واحد يكره واحد بزاف بزاف بزاف...............
ايا سمع بلي راه يلقف (يحتضر) جا يستشفى فيه...
قالو ما تقنطش يا حبيبي الموت كاينة وتكون قغ نموتو...وشنو انت رايح رايح قلت نعطيك وصاية تلحقها في طريقك ل بابا ....
قالو اواه مانيش رايح من جيهة l'enfer كي تلحق دالتك اديهالو انت....................هههههههههههههههههه

*واحد هامل قالولو كي تكون تمشي كيفاش تعرف يدك اليمنى من يدك اليسرى؟
قاللهم كي نكون نمشي الصبع الكبير تع اليد اليمنى يكون صاد لليسري
و الصبع الكبير تع اليد اليسرى يكون صاد لليمنى..........هههههههههههههههه.

*قالك واحد يحب يسوق الطيارة....كي كبر سرق طيارة وبدا يسوق فيها على حساب واش يقول الكتاب اللي كان يرفدو معاه .......
ايا كي حب يحبط قلب الصفحة باش يشوف كيفاش يحبط.....لقا مكتوب...أم عن كيفية الهبوط فسنوافيكم بها في العدد المقبل ان شاء الله.
قالك واحد بايت في فندق...في الليل هبط للحارس قالو ........اعطيني كاس ماء الله يحفظك...........ادا الكاس واطلع يجري امبعد ارجع يجري قالو تعيش زيد واحد ........عاوود ططلع وهبط كيف كيف التالتة والرابعة...........قالو واش مازال ما رويتش؟
قالو مانيش عطشان شمبرتي راها تتحرق.........
ههههههههههههههههههههه


*قالك واحد شاف للمنارة نتاع الجامع وقال للصاحبو......زعما شحال يكونو طوال هذو اللي بناو هذي المنارة.......
قالو اسكت ياخي جايح ......هذي يا بناوها في الارض امبعد رفدوها..........يا حفروها بئر مبعد قلبوه للسما..........

*قاللك دجاجة دخلت للجامع في وقت الصلاة.....وراحت من جهة النساء.....قطقطقطقطقط قطقط قطقط
قالت لها امراه ...اش اش اش اش امشب اتلفي لهيك خلينا انصلوا
قالتلها الاخرى با كشفتي ياخي ما يهدروش في الصلاة.......
قالت الثالتة .....بوووووه وانتي علاش اهدرتي؟؟

*قالك واحد زوجتو ولدت في الدار ..ونجحت الولادة ...فالرجل فرح بابنو بزاااف.......
وسماه على اسمو رمضان........ربع ساعه طبطب الفاكتور جايب الورقة نتاع التلفون
قال السي رمضان راه هنا؟...
قالو الاب....شكون رمضان......الكبير ولا الصغير؟............هههههههههههههه....

*قاللك واحد حضر حصة تع كونغ فو تعلم كيفاش يحط يدو فوق انفو بحيث راحة اليد تكون نحو الجهة اليسرى...وهذا عندم يحب الخصم يحاول يعميلو كلتا عينيه......فيدو تتمكنمن الدخول بين الاصبعين وما يوصلوش للعينين......جا للدار لعشية وحب يزوخ على ابنو ويعلمهالو.....قالو مرار ....مراد....ارواح هنا.....اعميني.
الطفل ضحك ...قالو راني سيريو قلتلك اعميني....قالو ابنو كيفاش نعميك يا بابا....راك تتمسخر.....قالو قلتلك اعميني.....بزوج صبعتين...قالو يابابا ان نحبك ما كاش كيفش نعميلك عينين في زوج 02 . نعميلك غير واحده....(شطق.....آآآآآآآآي)
ههههههههههههههههههههههههههههههههههههههههههههه

*هذا واحد جاري عمرو ما صلى ....ووصل لخمسة و عشرين سنة هكذاك....قاللو وليد عمو يا مصطفى وانت واش دعوتك لوقتاش ماراحش تصلي....قاللو ما نعرفش نصلي..وهو انسان محبس سنة 01 ابتدائي....المهم قاللو ابن عمو الصلاة حاجة ساهلة ...ادخل للجامع امبعد شفتهم وقفوا اوقف....شفتهم ركعوا اركع...شفتهم قعدوا اقعد انت تاني...قالللو هذا ماكان....هذا ماكان....المهم في العصر اداه معاه وقعد باش يصلي قدامو....بصح ابن العم شاف فجوة قدامو اتقدم وخلى مصطفى يصلي وراءه...ومت 02 ركعات عادي ...مصطفى يشوفهم ركعوا يركع يشوفهم سجدوا يسجد.......لكن هذي المرة ما وقفوش...قعدوا للتشهد ....ومصطفى ما فهم فيها والو...خزر يمين شمال شاف الجماعه كامل يدورو في صبعتيهم ...خزر في وليد عمو اللي كان قدامو و عطاه دبزة (لكمة) ...قاللو وهذي علاش ما قلتليش عليها؟

*قاللك واحد عندو 4x4 ديما لعشية يحبسها عند الباب ...كي ينوض الصباح يصيب مكتوب قدامها (=16) ...يحمحيها غدوا من ذاك كيف كيف بعد غد كيف كيف.....ايا كيما دار معا هذا السامط حصل......وحد النهار صابو كاتتبلو =16 زادو قدامها (ممتاز)......من ذاك النهار تهنى.......................

*
قالك آلجيريان راح لانقليز ، ركب في الكار تع دوزيطاج !
قالولو ، أهبط ، روح ليطاج التحتاني ، كي يتعمرو البلايص التحت ، يركبو لي الفوق ..
ما حبش يحبط .. كيما دارو معاه .. والو !!
جا واحد دزيري ثان ، قالو حاجا في وذنو ، هبط يجري ليطاج التحتاني !

تخلعو فيه الناس ، قالولو، واش قلتلو باش هبط ؟

قالهم قلتلو برك بلي ليطاج التحتاني يديماري قبل الفوقاني ، هبط يجري !!


*قاللك واحد أعور يشوف بالدوبل ...زوجوه بوحدة عورة كيما هو....طيبتلو قهوة و فرغتلو 02 فناجل .....قاللها ليمن الزاوج يا امرة....قالتلو وهدا اللي جا معاك ما يشربش؟....قاللها وش بيك يا امرة اختك عايشة معانا و حبيتيني ندخل راجل للدار؟؟

*قاللك واحد يكره يكره يكره.........واش؟.........البطاطا...
ويماه هذاك واش تطيب.......سلاطة بطاطا.....بطاطا راقو......بطاطا مقلية.....
المهم خطرة مرقتها (زودتها)....فطور بطاطا راقو .........عشاء بطاطا راقو........فطور بطاطا راقو............اخلاص ماقدرش......راح يجري لدار جداه يقوللك اليوم نديباني روحي عندها.........سقاتلو شوية طعام (كسكس) قالتلو ما تاكلوش ناشف حتى نسقيلك.....واش سقاتلو فوق الطعام؟؟............غمسة بطاطا........قاللها ايه يا جدة.........البطاطا في دارنا خليتها تعوم.....جيت هنا لقيتها تبرونزي........

*حكاية الزوالي والمرفه
الزوالي في وسط الجماعة قاللهم الفار دخللي لشمبرتي وكلالي القشابة دار فيها ثقبة قد الدنيا......قالولو ايا خليك كيفاش الفار يقطعلك قشابة.....بركاك ماتكذب.....
في اليوم التالي........
المرفه قاللهم الفار كلا الباب تع الحديد من التحت ودخل عندي للدار...............
نطق ليه واحد وقال ....يديرها المنكري .....انا ثقب لي المهراس والطنجرة...

*
قاللك واحد كان حاب يروح لفرنسا بصح ما يعرفش فرنسي قالولو ماتخافش اللي يقولوهالك دير روحك فهمت و قول وي....
tu es Algerien? oui
tu parles le français§ oui
tu veux manger? oui
....................
....................
وحد النهار تلاقا مع واحد قاطع طريق قاللو
tu veux boxer? قاللوoui
ايا عطاه طريحة وطلقو
قال لصاحبو ما خرجتش علي وي .....لازم ندورها نو
غدوا من ذاك تلاقا مع مولا دعوتو قاللو انذعرت؟ قاللو نو........قاللو امالا ارواح نزيدلك...........

*قاللك واحد محامي دعاتلو يماه دعوة الخير قالتلو يا وليدي الله يبعد عليك اولاد الحرام...قاللها واش تساليني يا يما حبيتيني نموت بالشر؟................!!!!!!!

*قاللك واحد خرج من الدار زعفان لقى ابريق في الطريق.........عطاه بركلة....خرجلو العفريت و قاللو شبيك لبيك واش تطلب يجي بين يديك.....قاللو حاب نرجع عفريت كيما انت.........قاللو ماكاش كيفاش.......اطلب حاجة مليحة علاش رايح للميزيرية.......قالو واش من ميزيرية اكتر من اللي راني فيها ...رجعني عفريت كيما انت امبعد انا نحقق احلامي وحدي..............رجعو عفريت.................امبعد السيد بعد عليه 10 ميترات وبدا يقول في وحد التعويذات من راسو .......قالو واش راك تدير ؟...........قاللو راني نحوس نحقق احلامي ..السكنة....المراة راك عارف..........قاللو يتسمى جيتك جايح انا خفات علي هذي....ياخي مهبول ياخي.....ايا بون نوي...
قاللو ارجى ارجى وين راك رايح ومخليني....قاللو علاش جيت معاي راني رايح للبريق انتاعي انبات......

*قاللك واحد حب يدير تجربة على الكلب كيما دار.......بافلوف ولا واش اسمو؟؟
المهم حطلو شوية لحم مبعد قاللو........ايسي ايس ايسي.............الكلب جا يجري و ادا القطعه تع اللحم
امبعد نحالو ارجل وقالو ايس ايسي ...........الكلب جا يعرج......وادا اللحم ورجع
زاد نحالو رجل ..........جا يعرج على الزوج لي بقاو................وادا قطعة اللحم
زاد نحالو الرجل الثالثة..........وبدا يعيطلو ايسي ايسي.............ماجاش الكلب.....
فتح البلوك نوت نتاعو وكتب..........ومنه نستنتج انو الكلب اذا نحيتلو 03 رجلين يولي مايسمعش!!!!!!

*قاللك واحد حب يسويسيدي ......شافتو مرتو يمونطي في الحبيلة ........ابدات اتحلل فيه لالالالا يا راجل وش راح تدير........
قاللها يا امره ذركا انا ديسيديت نسويسيدي......كان عجبتني الحاله في الجيهة الاخرى ......راني ندير البوسيبل باش نعيطلك......وتسويسيدي انتيا ثاني ونعيشو ثما لاباس..................
كان ماعجبتنيش راني نعاود نسويسيدي ثماك......باش نرجع ليك هنا!!!!!!!!!!!!!!

*قاللك واحد المرة شاب يصلي قدام شيخ كبير........وقبل تكبيرة الاحرام الامام قال ...الكتف للكتف والقدم للقدم يسوى الصف.......سدوا الفرج ولا تتركوا فرجات يتخللها الشيطان........الشاب فهموا وحط رجلوا قدام رجل الشيخ والشيخ الله غالب مافهمش.......بدا يجبد في رجلو ليه و الشاب يتبع فيه باش يسد الثغرة........قاللو ...واش بيك تتبع فيا آآو!!!!!!!!
قاللو الشاب باش نسدوا الفرجة على الشيطان ما سمعتش الامام واش قال؟؟
قاللو الشيخ........واش من فرجة يرحم باباك ....انت الجمل يقدر يجوز ما بين رجليك!!!!!!

*الشيخ تاع الانجليزية للتلاميذ..........كيفاش نقولو " سعيد" بالانجليزية؟؟
نطق ليه تلميذ قاللو..........شيخ شيخ.........قاللو تفضل...........
قاللو "هابي Happy"
قاللو احسنت .......ديرهالي في جملة.........
التلميذ خمم شويا مبعد قاللو........شيخ شيخ........هابي فوق الشجرة!!!!!!!!

*قاللك وحد الشيخ من بكري داير العمامه......خطرة مرق بللي رجعت ديمودي.........قال نسيي نخرج بلا بيها.......كي خرج
فقد الذاكرة!!!!!!!!!!!!
نسا مخو في العمامه...........ههههههه


*قاللك وحد البنت جابت برمي جديد وعلقت ال80 وراحدت تجري في الطريق.......كي تجاوزت السرعة صفرلها البوليسي.........رجعت ليه قاتلو......اسمع قادر روحك .......عمرك ما شفت طفلة تسووق؟!!!!


*قاللك واحد سألوه شكون خير الشمس ولا القمر................
قاللهم طبعا القمر...............لانو القمر يجي يضوي علينا الظلمة تع الليل
و الشمس تجينا في النهار........وفي االنهار كاين النور تع سيدي ربي!!!!

*قاللك واحد ما يعرفش العلك.......شرى حبة وبقى يعلك حتى طاح الليل............قال و الله ماني راقد حتى نكملها!!!!!!!!!

*قاللك واحد بدوي حاله ما شاف في حياتو غير المعزة........دخل لمحل تع اليكتروميناجي.........
قاللو شحال هذا التليفزيون ااااااا خيي؟؟ قاللو اخرج امشي روح اتلف عليا
غدوا من داك حفف الموستاش ودار كاسكيت و سروال جين وقاللو..........شحال هاذ لاتيلي صاحبي؟؟؟ قاللو قلتلك روح ماتزيدش تجي
غدوا من ذاك لبس عباية تع يماه وجاليه.........يا بني قولي قداه يدير هاذ التيليفيزيو؟؟؟ ....قاللو انت واقيلا م تفهمش.....ما تزيدش تجي!!!!!!!!!!!
البدوي نحا العباية و قاسها بالزعاف و قاللو يا صاحبي انت لبستلك الجين مرقتلي لبستلك العباية عرفتني راك ممورني ولا كيفاه؟؟
قاللو علاخاطر هذا ميكرو ويف ماشي تيليفيزيون يا الجاهل!!!!!!!

*قاللك النمر جايبها مور الارنب .................وين يصيبو يعطيه ضربة و يقوللو.......علاش وذنيك طوال علاش؟؟
الارنب اشتكا للسبع من تصرف النمر معاه.....
السبع حكم النمر وقاللو ماشي هكذا يا النمر اتحيل معاه......قوللو جيبلي جزر اصفر......اذا جابو صفر اضربو وقوللو قلتلك جزر احمر ..والعكس................راح النمر للارنب قاللو جيبلي جزر..............الارنب قاللو جزر احمر ولا....اصفر..!!
رجع النمر ضربو وقالو علاش وذنيك طوال علاش.؟!!!!

*

*
هدا
واحد ربح في لوطو(الرهان يعني) قال نشرجيها(يعني نفليكسيها) كاملة في
التيليفون فليكساها كي كمّل ردت عليه خدمة الزبائن قاتلوا : رصيدك الى يوم
القيامة



*
واحد
زاطل راح للطبيب يشكي بلي كلما يرقد ‏يحلم بقطط يلعبو في الكرة . قالو
الطبيب : مترقدش يومين .. قال المزطول: ما نجمش على خاطرغدوة La Final
*
واحد
مزطول رافد علبة نتاع مسامير و طاح منهم مسمار قالو يا ولدي أرجع يرحم بوك
ارجع.... المسمارمحبش يرجع.... فرّغ علبة المسامير كلها و قالهم :
جيبوووووووووووووه




*
واحد الحلاق شاد مغناطيس على راس زبون معمّر بالشعر تعجب الزبون و قالو: واش راك دير ؟ قالو الحلاق: راني نحوّس على المقص طاحلي!!!






*
واحد يتعامل بزاف مع البورصه طاح مريض
داوه للطبيب
الطبيب وهو يكشف عليه قالو يا الله ضغطك وصل 70
صاح المريض و قالو : بيع بيع بييييييييييع






*
سأل
ولد أبوه : بابا كيفاش نعرفوا بلي واحد راه سكران. قالوا أبوه : شوف يا
ولدي ..هذوك الزوج شجرات يشوفهم السكران أربعة شجرات. دار الولد و شاف بصح
شاف غير شجرة وحدة !!!!!
*
واحد راح لطبيب باش ينحيلو مسمار دخلو في رجلو كي قالو ب 2500 دينار جاوبو وقال عوجو وخليه






*
راجل كبير في العمر قالولو: وآش عامل فيك رمضان يا الحاج.
قاللهم كون مش من رشفة الوضوء العبد يموت مالعطش
*
قالك
وحد الخطرة وحد السيد اشرى كبش العيد قبل عيد الاضحى بشهرين امالا كانت
العائلة كلها تدلل فيه وتلعب معاه حتى انه ياكل معهم و ينام معاهم في
المنزل و عشية عيد الاضحى راح الكبش جبد روحو على العايلة و بدى يبكي جات
العايلة سالتو واشبيك تبكي قالهم " قعدنا بلا عيد الناس اكل شراو الكباش
غير احنا "
*
قالك واحد جزائري لقى وحدة مصرية قالها واش مدايرا في حياتك
قالتلوا :انا بقرا في الكلية (باللهجة المصرية)
قالها :انا ثور في السوناطراك (شركة بترول جزائرية)


*قالك كاين واحد الإمام يطول بزاف في الخطبة نتاعو لدرجة أنو قبل ما يخرجوا يذن العاصر

قالك تفاهمو وبدلوه , جا واحد أوخر يعرفو , قالهم علاه خرج

قلولو يطول بزاف خرجناه

ومن بعد قالهم تعرفو قصة سيدنا نوح ,قالو هيه قالهم مالا نودو تصليو

كي جاو خارجين قالهم تعرفو قصة سيدنا يوسف قالو هيه قالهم ماتجيوش الجمعة الجاية

جاو ,وكي خرجوا قالهم تعرفوا قصة سيدنا داود نصف قال هيه ولوخر قال لا لا قالهم النصف لي يعرفها يحكيلها لليما يعرفوهاش

جاو ’وكي خرجو قالهم تعرفو قصة سيدنا صالح ,الجميع قالو لا لا , قالهم ما عندكم ما ديرو بيها
*
*قال الطبيب للمريض:هذه الحبوب للقلب وهذه للكبد والاخيرة للامعاء
فقال المريض:وعندما ابتلعها كيف تذهب كل حبة الى مكانها؟؟
*قال الطفل:يا رب اجعل باريس عاصمة بريطانيا.
فقال صاحبه:لماذا؟
فرد عليه لانني كتبت ذلك في الامتحان!
*قال الطفل:لماذا اتت هذه الخادمة السوداء؟
قالت الام:لترضع اخوك الصغير
فقال الطفل:وهل ترضعه حليبا ام قهوة؟!

*
قالك مرة سائق الحافلة دار اغنية التيتانيك
ايا بداو الركاب ينقزوا (يرمون انفسهم خارج الحافلة) حسبوا الbus راح يغرق
****
اقسم ان اضع ردا لقد اقسمت ولذلك فالتضع ردا


إضحكوا شويا

وردوا بزاف

سلام








الرجوع الى أعلى الصفحة اذهب الى الأسفل
 
جبتلكم نكت جزائرية 2010
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1
 مواضيع مماثلة
-
» التعليم المبرمج ـ منقول ـ
» المنمنمات
» سيف الدين قطز
» مع اميرة القلوب انتي احلى>>اجمل اتسريحات والمكياج
» صور مراقد أئمة البقيع

صلاحيات هذا المنتدى:لاتستطيع الرد على المواضيع في هذا المنتدى
منتدى نادي الابداع الفكري - عين الدفلى :: نادي الألغاز و الحكايات :: طرائف و حكايات-
انتقل الى: